Neidio i'r prif gynnwy

Gweinidog yn cyfarfod ag ysgol sy'n llunio cymorth iechyd ac addysg newydd i blant ag anableddau dysgu

The Chair of Govenors at Ysgol Maes y Coed, the Minister for Mental Health and Wellbeing, the Head Teacher at the school, Improvement Cymru

8 Tachwedd 2024


The Minister for Mental Health and Wellbeing talks to the classroom. Croesawodd Ysgol Maes y Coed Sarah Murphy, y Gweinidog Iechyd Meddwl a Llesiant, i’r ystafell ddosbarth i ddysgu am brosiect newydd arloesol sydd â’r nod o wella iechyd a lles plant ag anabledd dysgu.

Mae'r plant ym Mryncoch, Castell-nedd wedi cymryd rhan mewn her chwe wythnos i archwilio pynciau allweddol, fel iechyd corfforol, iechyd meddwl, gofal personol, hylendid, bwyta'n iach ac ymddygiad cadarnhaol.

Gwahoddwyd rhieni a gofalwyr hefyd i sesiynau rhithwir i helpu i greu system gymorth gyfannol ac annog dysgu gartref.

Dywedodd Sarah Murphy, y Gweinidog Iechyd Meddwl a Llesiant:

“Mae perthnasoedd cryf rhwng addysg a gofal iechyd yn allweddol i ofalu am y plant yn ein cymunedau sydd ag anableddau dysgu, felly rwy’n falch iawn o weld y cynnydd y mae’r prosiect hwn wedi’i wneud. Gwyddom fod plant ag anabledd dysgu yn profi anghydraddoldebau iechyd a gall ymyrraeth gynnar wneud byd o wahaniaeth.

“Rydym eisoes yn gweld manteision dull rhagweithiol, megis nodi problemau iechyd yn gynharach a grymuso unigolion i fonitro eu hiechyd. Gall y rhain arwain at well canlyniadau iechyd gydol oes ac rwy’n gyffrous i weld yr effaith y gall hyn ei chael ar blant a’u teuluoedd ledled y wlad.”


Pecyn adnoddau addysg iechyd newydd

Fel rhan o’r prosiect, mae pecyn adnoddau addysg iechyd newydd wedi’i gydgynhyrchu yn cael ei ddatblygu drwy gydweithio rhwng plant, rhieni, nyrsys ysgol ac athrawon. Bydd y fersiwn derfynol ar gael ar draws iechyd ac addysg yng Nghymru i hyrwyddo dull cyson sy’n seiliedig ar y gynulleidfa o gefnogi dysgwyr ag anableddau dysgu.

Bydd y pecyn adnoddau yn cyd-fynd â'r Gwiriad Iechyd Blynyddol, y Proffil Iechyd Unwaith i Gymru, a'r Cynllun Datblygu Unigol. Bydd yn cael ei integreiddio â’r Cwricwlwm i Gymru ac yn cefnogi’r Weledigaeth Genedlaethol ar gyfer Babanod, Plant a Phobl Ifanc ag Anabledd Dysgu, sy’n amlinellu’r angen am fynediad at wybodaeth i gadw’n iach.

The Minister for Mental Health and Wellbeing talks to the Chair of Governors and Head Teacher at Ysgol Maes y Coed. Ychwanegodd Helen Glover, Pennaeth Ysgol Maes y Coed:

“Rydym yn falch iawn o'r plant a'r ffordd y maent wedi ymgysylltu â'r maes llafur. Mae hon yn ffordd newydd o weithio ar gyfer ein hysgol, ond mae wedi atgyfnerthu i ni pa mor bwysig yw hi i wasanaethau gael eu llywio gan y rhai sydd â phrofiad bywyd.

“Mae ein dysgwyr sy’n cymryd rhan yn y prosiect o gyfnodau allweddol dau a thri. Gallwn weld eisoes eu bod yn fwy ymwybodol o ymddygiadau iach ac yn fwy parod i wneud penderfyniadau gwybodus am eu lles.

“Yn hollbwysig, gall y gwersi hyn fod o fudd i blant ag anableddau dysgu nid yn unig heddiw, ond yn y dyfodol wrth iddynt drosglwyddo i wasanaethau oedolion. Bydd y pecyn adnoddau yn help mawr i leoedd lle mae iechyd ac addysg yn ategu ei gilydd, fel ein hysgol ni.”


Cydweithio

Mae’r prosiect yn gydweithrediad rhwng Ysgol Maes y Coed, Gwelliant Cymru o Weithrediaeth y GIG, a’r Gwasanaeth Nyrsio Ysgol o Fwrdd Iechyd Prifysgol Bae Abertawe. Darparodd Gwelliant Cymru reolaeth prosiect, cyfeiriad strategol a dyraniad adnoddau.

Rebecca Curtis presents the National Vision for Children and Young People to the Minister for Mental Health and Wellbeing. Dywedodd Rebecca Curtis, Uwch Reolwr Gwella rhaglen Anabledd Dysgu Gwelliant Cymru:

“Mae cryfhau’r cydweithio rhwng y sectorau iechyd ac addysg yn hanfodol i gyflawni canlyniadau lles gwell, ymdrechion mwy integredig a llwybrau gofal symlach.

“Rydym wedi casglu data ar y dechrau ac ar y diwedd. Mae hyn wedi ein galluogi i gasglu agweddau a phrofiadau plant o wasanaethau iechyd, a fydd yn llywio gwelliannau yn y dyfodol ar draws y system ar gyfer y rhai ag anableddau dysgu.”

Casglwyd mewnwelediadau gwerthfawr gan gyfranogwyr drwy gydol y prosiect, gan gynnwys:

  • Mae plant a phobl ifanc yn wynebu rhwystrau cyfathrebu ac yn ei chael hi’n anodd deall gwybodaeth feddygol pan nad yw wedi'i haddasu i'w hanghenion neu wedi'i chyflwyno mewn fformatau hygyrch.
  • Mae mynegi teimladau neu symptomau yn aml yn heriol i’r rhai ag anabledd dysgu, sy’n cymhlethu’r diagnosis a’r driniaeth a gânt.
  • Dywed llawer o weithwyr gofal iechyd proffesiynol nad oes ganddynt ddigon o hyfforddiant mewn gweithio gyda phlant ag anableddau dysgu ac efallai nad ydynt yn gwybod sut i wneud yr addasiadau angenrheidiol ar gyfer cyfathrebu effeithiol.
  • Yn aml nid oes gan gyfleusterau gofal iechyd addasiadau rhesymol derbyniol ar gyfer plant ag anabledd dysgu, yn enwedig y rheini â sensitifrwydd synhwyraidd, sy’n ei gwneud yn anodd cael mynediad at eu hapwyntiadau iechyd.
  • Yn aml nid yw teuluoedd yn ymwybodol o broffil iechyd plant ag anableddau dysgu, sy'n amlinellu'r addasiadau rhesymol angenrheidiol ar gyfer cyrchu gwasanaethau gofal iechyd.
  • Mae ysgolion arbennig ledled Cymru yn croesawu mwy o gyfranogiad iechyd a chydweithio i ddiwallu anghenion eu dysgwyr mewn amgylchedd diogel a chyfarwydd.

Bydd y pecyn adnoddau addysg iechyd terfynol ar gael i randdeiliaid iechyd ac addysg yng Nghymru yn Mawrth 2025.

Mae amrywiaeth o adnoddau ar gyfer plant, rhieni, gofalwyr a gweithwyr gofal iechyd proffesiynol ar gael gan Gwelliant Cymru, gan gynnwys Proffil Iechyd Unwaith i Gymru.

Ewch I www.improvementcymru.net/learning-disability am ragor o wybodaeth.