Cydweithrediad rhwng Bwrdd Iechyd Prifysgol Bae Abertawe ac Amser i Newid Cymru i ddarparu hyfforddiant i Staff y GIG i Herio Stigma a Gwahaniaethu ym maes Iechyd Meddwl

Bwrdd Iechyd Prifysgol Bae Abertawe

Mae Amser i Newid Cymru yn casglu barn a gwerthusiad rheolaidd i ddangos ei effaith ac i lywio cyfeiriad gwaith yn y dyfodol. Yn ôl tri darn o ymchwil meintiol gan Amser i Newid Cymru yn 2017, 2019 a 2021, mae stigma iechyd meddwl wedi’i brofi mewn gwasanaethau gan gynnwys lleoliadau gofal iechyd. Rhwng 2019 a 2021, gwelodd Amser i Newid Cymru fod cynnydd yn nifer y rhai yr ymddengys eu bod yn cael eu trin yn annheg gan weithwyr iechyd meddwl proffesiynol mewn perthynas â’u hiechyd meddwl (o 4% i 15%).

Er mwyn ymateb i’r heriau hyn, cafodd Bwrdd Iechyd Prifysgol Bae Abertawe ei wahodd gan Amser i Newid Cymru i sesiwn ddarganfod er mwyn nodi’r dull gorau o fynd i’r afael â’r materion hyn. Roedd y sesiwn hon yn cynnwys aelodau o staff o’r gwasanaethau Iechyd Galwedigaethol, Ansawdd a Diogelwch ac Iechyd Meddwl er mwyn sicrhau cynrychiolaeth eang o staff. O ganlyniad i'r sesiwn hon, cafwyd cytundeb rhwng Bwrdd Iechyd Prifysgol Betsi Cadwaladr, Bwrdd Iechyd Prifysgol Cwm Taf Morgannwg ac Amser i Newid Cymru i fynd ar drywydd datblygu modiwl hyfforddi pwrpasol am gyfnod prawf.

Roedd y rhaglen hyfforddi'n cynnwys cyfres o fodiwlau yn null rhoi cyflwyniad, ynghyd ag astudiaethau achos fideo cymhellol yn cynnwys cyfraniadau profiad byw, trafodaethau ar sail senario, myfyrio ar lesiant y gweithwyr eu hunain fel gweithwyr gofal iechyd, a chynllun dysgu personol. Roedd y fideos hyfforddi hefyd yn cynnwys staff y GIG yn trafod eu profiadau o weld stigma ymhlith cleifion.

Ers y flwyddyn beilot yn 2021, mae Amser i Newid Cymru wedi hyfforddi cyfanswm o 757 aelod o staff y GIG, gyda 99% o’r staff o Fwrdd Iechyd Prifysgol Bae Abertawe. O ganlyniad i’r hyfforddiant hwn, mae staff Bwrdd Iechyd Prifysgol Bae Abertawe yn fwy ymwybodol o sut y gall stigma effeithio ar deithiau cleifion, ac maent wedi gallu myfyrio ar eu harfer presennol a nodi sut y gallant gyfrannu at y newid cadarnhaol hwn mewn ymddygiad. Roedd yr hyfforddiant yn cynnig lle diogel iddynt drafod a rhannu profiadau ac ystyried eu llesiant eu hunain, gan ddeall a nodi’r arwyddion rhybudd gan ddefnyddio’r Continwwm Iechyd Meddwl.