Tîm Anaf Caffaeledig i'r Ymennydd Bwrdd Iechyd Prifysgol Aneurin Bevan a Choleg Adfer Cyflyrau Niwrolegol Niwrostiwt

Bwrdd Iechyd Prifysgol Aneurin Bevan

Yn 2018 roedd Tîm Anafiadau Caffaeledig i’r Ymennydd Bwrdd Iechyd Prifysgol Aneurin Bevan yn ei chael hi’n anodd ateb y galw gan fod nifer fawr o atgyfeiriadau ac anawsterau o ran rhyddhau. Roedd problemau ‘wrth y drws blaen’ yn cael eu rheoli trwy feini prawf gwahardd mympwyol yn seiliedig ar yr amser ers anafiadau a difrifoldeb anafiadau. ‘Wrth y drws cefn’, siaradodd defnyddwyr gwasanaeth am y bwlch rhwng y gwasanaethau wedi’u darparu gan y tîm a'r cymorth sydd ar gael iddynt yn y gymuned. Roedd y bwlch hwn yn ei gwneud hi’n anos rhyddhau pobl, gan arwain at lwythi achosion cynyddol a oedd yn gwaethygu problemau ‘wrth y drws blaen’ ymhellach. Roedd adborth gan staff a defnyddwyr gwasanaeth yn dangos bod y sefyllfa'n cael effaith andwyol ar y ddau grŵp.

Nod y Tîm Anaf Caffaeledig i'r Ymennydd oedd sefydlu diwylliant o gydweithio rhwng 'arbenigwyr trwy hyfforddiant' (staff gofal iechyd) ac 'arbenigwyr trwy brofiad' (goroeswyr strôc ac anaf i'r ymennydd). Bwriad y nod hwn oedd grymuso pobl i fyw'n dda trwy ddarparu cymorth hygyrch, teg ac amserol. Y canlyniadau a nodwyd ar gyfer y prosiect oedd mwy o ymdeimlad o degwch, diogelwch trwy fynediad hawdd, cysylltiad, ymgysylltu, cyflawniad, pwrpas ac ystyr. Ceisiodd y tîm hefyd sefydlu diwylliant o ddysgu yn y ddwy ffordd gan gefnogi gwella ar gyfer derbynwyr gwasanaeth a darganfod ar gyfer darparwyr gwasanaethau. Cafodd dwy strategaeth eang eu mabwysiadu i symud ymlaen tuag at y canlyniadau disgwyliedig: datblygu Coleg Adfer Cyflyrau Niwrolegol ac ymdrechu’n galetach i ymwreiddio Fframwaith Canlyniadau Arfaethedig Nodau Gofal.

Cafodd y Coleg Adfer ei sefydlu ar y cyd â defnyddwyr gwasanaethau a chydweithwyr yn y trydydd sector i lenwi’r bwlch rhwng y ddarpariaeth iechyd a’r ddarpariaeth trydydd sector bresennol. Mae ei ddull gwreiddiol yn newid o ganolbwyntio ar therapi ar gyfer pobl sâl i ganolbwyntio ar ddysgu byw’n dda.

Diolch i lwyddiant y strategaethau wedi’u mabwysiadu, mae meini prawf mynediad penodol o ran amser a chyflwr wedi'u dileu, gan ehangu mynediad a lleihau annhegwch. At hynny, mae'r tîm bellach yn gweithredu heb restr aros.