Prosiect Gwas y Neidr – Gofal uchel ar y ward ar gyfer cleifion sgoliosis idiopathig ôl-driniaethol
Sashin Ahuja, Llawfeddyg Asgwrn Cefn Ymgynghorol, Bwrdd Iechyd Prifysgol Caerdydd a'r Fro
Cyflwyniad
Mae Scoliosis Idiopathig y Glasoed (AIS) yn effeithio ar 2-3% o bobl ifanc, gan arwain at grymedd difrifol yn y cefn sy’n gofyn am lawdriniaeth gymhleth. Mae’r risgiau yn ystod ac ar ôl llawdriniaeth yn cynnwys gwaedu a phroblemau niwrolegol, gan olygu bod angen gofal ôl-driniaethol lefel uchel a ddarparwyd yn flaenorol gan Unedau Dibyniaeth Uchel Pediatrig (PHDU).
Arweiniodd cynnydd yn y galw am unedau PHDU at ganslo llawer o lawdriniaethau gan effeithio ar restrau aros, iechyd meddwl cleifion, ac achosi costau uchel. Er mwyn mynd i'r afael â hyn, bu'r tîm yn ystyried sefydlu ardal uchel yn y Ward Llawfeddygol Bediatreg, gan feincnodi gydag ymddiriedolaethau eraill wrth chwilio am ddatrysiadau.
Dulliau
Ynghyd â llawfeddygon asgwrn cefn ymgynghorol, y tîm meddygol pediatrig, anesthetyddion, a thîm nyrsio Ward Gwdihŵ, fe wnaethom sefydlu 'Prosiect Gwas y Neidr,' gan greu ardal gofal lawfeddygol uchel ar Ward Gwdihŵ. Roedd hyn yn cynnwys sefydlu ardal gyda phedwar gwely ar gyfer arsylwi agos a monitro rhydwelïol ac uwchsgilio staff gyda chymorth ein tîm addysg ymarfer. Roedd y prosiect yn gofyn am hyfforddiant staff helaeth, diwrnodau addysgol ac asesiadau cymwysedd.
Cynhaliodd yr uwch dîm nyrsio asesiadau risg i sicrhau gofal safon aur, tra bod rheolwr Ward Gwdihŵ yn gyfrifol am reoli staff a gofynion gwasanaeth. Roedd cydweithio â thimau asgwrn cefn, pediatreg ac anesthetig yn hanfodol ar gyfer datblygu sianeli cyfathrebu a llwybrau diogelwch.
Ar y cyd, creodd pob tîm fframwaith manwl a derbyniwyd y cleifion cyntaf i Fae Gwas y Neidr ym mis Mehefin 2023. Sefydlwyd sianeli cyfathrebu, cynlluniau uwchgyfeirio, gweithdrefnau llawdriniaeth a llwybrau llif cleifion. Nodwyd anghenion hyfforddi, a chafodd nyrsys eu hyfforddi i ddarparu'r gofal arbenigol oedd ei angen.
Roedd gofal ar gyfer cleifion scoliosis, oedd yn cael ei roi yn flaenorol mewn Uned Dibyniaeth Uchel Bediatreg, bellach yn cael ei roi gan nyrsys medrus iawn ar Ward Gwdihŵ, gan gynnwys monitro pwysedd gwaed mewnwthiol trwy linellau rhydwelïol. Cafodd y gofal ei oruchwylio gan feddygon asgwrn cefn, anaesthetig a phediatrig.
Canlyniadau
- Effaith fawr ar amseroedd rhestrau aros, llawer llai o theatrau’n cael eu canslo a llai o straen ar unedau dibyniaeth uchel plant.
- Roedd achosion o ganslo oherwydd diffyg gwelyau PHDU/PICU ar 40% yn 2022. Ar gyfer cleifion AIS, does dim canslo o gwbl yn digwydd bellach.
- Gwelliant amlwg mewn boddhad cleifion a gallu cael y gwasanaeth sydd ei angen mewn da bryd.
Dysgu
- Dysgu gan ymddiriedolaethau eraill trwy feincnodi ac ymweliadau ysbyty.
- Roedd cydweithio o fewn y tîm amlddisgyblaethol yn allweddol.
- Gallai cyflwyno'r fenter yn gynharach fod wedi atal rhestrau aros rhag cynyddu.
- Roedd angen mewnbwn sylweddol, gan bwysleisio gweithredu’n ddiogel a phrydlon.
Beth nesaf?
- Parhau i gynnal prosiect Gwas y Neidr gyda gwerthusiadau rheolaidd.
- Gwella gwasanaethau gan ddefnyddio adborth gan staff, cleifion a pherthnasau.
- Ehangu’r fenter i leihau amseroedd aros a chansladau.
- Potensial i gymhwyso’r fframwaith i wasanaethau llawfeddygol pediatrig eraill.